Velferðarráðuneyti svarað

 

Í fréttatilkynningu sem birtist 19.4 á vef Velferðarráðuneytis http://www.velferdarraduneyti.is/frettir-vel/nr/33836 er fullyrt að það séu "Rangar staðhæfingar í undirskrifalista gegn nýju lyfjagreiðsluþátttökukerfi" og undirskriftarlistinn sé marklaus.

 

Hér er tengill á undirskriftarlistann sem ráðuneytið gagnrýnir í frétt sinni:https://www.change.org/petitions/gu%C3%B0bjartur-hannesson-velfer%C3%B0arr%C3%A1%C3%B0herra-h%C3%A6ttu-vi%C3%B0-fyrirhuga%C3%B0ar-breytingar-%C3%A1-l%C3%B6gum-um-grei%C3%B0slu%C3%BE%C3%A1ttt%C3%B6ku-lyfja

 

Þar segir að Velferðarráðuneytið

 "bendir jafnframt á að áskorunin er marklaus þar sem ráðherrar hafa ekki vald til að fella úr gildi lög frá Alþingi."

 

Ég vissi frá upphafi að ráðherra hefði ekki þetta vald hins vegar var hugsanlegt að hann hefði vald til að fresta breytingunum. Það verður að beina þessum undirskriftarlista að þeim sem ber ábyrgð á framkvæmdinni og tiltaka hvert markmiðið er með undirskriftarlistanum. Ráðherra er ábyrgur og markmiðið er hætt verði við þessar breytingar. Þegar það spurðist út í byrjun apríl hvernig nýju fyrirkomulagi yrði háttað var búið að slíta þingi og engin leið að fá lagabreytingu fyrr en eftir kosningar. Fráfarandi stjórn og ráðuneyti hefur stillt tímasetningum á þessum breytingum þannig upp að nánast ómögulegt er að bregðast við þeim. 

 

 

 

Velferðarráðuneytið segir:

"Í fyrsta lagi" - "Það er rangt að 30.000 einstaklingar fái öll sín lyf niðurgreidd að fullu."

 

Hér er alveg skautað yfir hve margir einstaklingar þetta eru þá í raun og einungis er sagt að talan sé röng. Því hlýtur að vera eðlilega krafa á ráðuneytið að birta tölur yfir þá sem fá:

• a.m.k eitt lyf niðurgreitt að fullu
• öll lyf niðurgreidd að fullu
• einhver lyf niðurgreidd

Velferðarráðuneytið segir að allir mun taka einhvern þátt í lyfjakostnaði en talar ekkert um að stór hópur fer frá því að greiða ekkert upp í að greiða 50-70.000 þús kr á hvern einstakling í fjölskyldunni, börn undir 18 telja þó saman sem einn einstaklingur (reyndar er það breyting sem var sett fram á síðustu metrunum). Ráðuneytið hefur væntanlega ekki áttað sig á því þar sem það hefur aldrei gert ráð fyrir að fólk hafi verið að fá fullan afslátt á sínum hlut frá apótekum. Það stækkar þann hóp sem hefur verið "niðurgreiddur að fullu" þó svo að það hafi ekki verið frá SÍ. Þessi hópur mun ekki lengur frá afslátt frá apótekum þar sem SÍ mun krefjast að fá hlut í afslætti sjúklinga í nýja kerfinu.


"Í öðru lagi" - "Nýja greiðsluþátttökukerfinu er einmitt sérstaklega ætlað að verja fólk í framantöldum hópum [fatlaðir, langveikir, öryrkjar og aldraðir] fyrir háum lyfjakostnaði, því þar er einmitt að finna flesta þeirra sem í núgildandi kerfi bera hvað mestan kostnað vegna lyfja."Ég sendi fyrir nokkrum dögum útskrift til ráðuneytisins og ráðherra af athugasemdum sem fólk hefur skrifað með undirskriftalistanum. Þar er augljóst að þessu kerfi tekst með engu móti að vernda þennan hóp heldur velta vandanum yfir á aðra innan hópsins sem áttu sér einskis ills von.


"Í þriðja lagi er fullyrt að óvíst sé hvaða lyf muni verða með greiðsluþátttöku sjúkratrygginga í nýju kerfi."

Það hefur verið mjög erfitt að fá upplýsingar um kerfið sérstaklega í byrjun apríl. Heimasíðan www.sjukra.ishefur tekið breytingum nánast daglega þar sem upplýsingum er bætt við. Væntanlega er þeim bætt inn eftir því sem fólk hefur samband og kvartar yfir því að það skorti á ítarlegri upplýsingar  hvernig þessu verður háttað í nýju kerfi. Ég hef sjálfur fengið misvísandi og röng svör frá SÍ  í mínum fyrirspurnum og eitt sinn sagt við mig að búið væri að senda tölvupóst á alla starfsmenn til að samræma svör eftir athugasemd frá mér. Fyrst þegar ég spurði um svo kölluð núll-merkt lyf þá vissi við komandi starfsmaður ekkert um þann kostnað sem ég mætti búast við. Núna nýlega má finna upplýsingar að hægt sé að fá núll-merkt lyf felld inn í kerfið ef viðkomandi hefur lyfjaskírteini. Aðrir á núll-merktum lyfjum þurfi að greiða þau að fullu. Þessar upplýsingar voru nýverið birtar á vef SÍ. Mér skilst að þar með hætti SÍ að greiða niður ADHD lyf fyrir marga fullorðna.


"Í fjórða lagi segir í áskoruninni: Fólk fær engan tíma til að undirbúa sig með því að spara milli mánaða. Þetta skellur á nær fyrirvaralaust."

Í lögum um greiðsluþátttöku kerfið kemur ekkert fram um hvernig þrepin eru né heldur hvaða lyf munu falla inn í greiðsluþátttöku, hvaða lyf munu ekki falla inn í greiðsluþátttöku og hvaða lyf mun áfram vera að fullu niðurgreidd og fyrir hverja. Reglugerðin hefur tekið miklum breytinum og ekkert hægt að stóla á endanlega útgáfu hennar fyrr en að hún er formlega gefin út. Hún kom út 9. apríl 2013. Það er nú allur fyrrivarinn.Þegar ég hafði samband við SÍ í byrjun apríl og óskaði eftir að fá reglugerðina senda fékk ég þau svör að hún væri ekki komin út og leitaði ég því ekki frekar eftir henni.Lagasetning eða drög af reglugerð getur ekki talist kynning á breytingum.


Að lokum vil ég benda þeim sem lesa þetta að taka eftir því hvað vantar í gagnrýnina frá Velferðarráðuneytinu :

• Þar er ekkert minnst á þá sem sjá ekki fram á að eiga fyrir fyrsta þrepinu í kerfinu.
• Það hefur ekkert verið skoðað hvaða áhrif þetta hefur á heimili sem eru með marga í einstaklinga sem nota lyf að staðaldri.
• Það hefur ekkert verið tekið tillit til þess að sumum sjúkdómum fylgir allskonar kostnaður fyrir utan lyf.
• Þar er ekkert rætt um hvenig SÍ rænir afslætti fólksins og þann auka kostnað sem færist yfir á sjúklinga við þann gjörning.

Baráttukveðjur

Sigurður Jónas Eggertsson

 

Athugasemdir

[Anna Guðrún (IP-tala skráð) 22.4.2013 kl. 19:10]

Ég er alveg til í þetta með þér :)

[Ólafur Ingi Brandsson, 24.4.2013 kl. 02:21]

Þetta er enn ein "GJÖFIN" sem velferðastjórnin skilur eftir sig, þvílíkur brandari.

Það er alveg sama hvernig litið er á núverandi stjórnvöld,

þau hafa tekið alla þá sem hafa minna á milli handanna í hverjum mánuði í þurrt ras..........

Þetta er fólkið sem blés út belgina og lofaði öllu fögru fyrir þennan stóra hóp fólks, síðan var þessi hópur fyrstir allra sem var fórnað fyrir innantóm og svikin loforð enda lítur allt út fyrir að þau fái að kenna á því.

Það var hægt að leiðrétta kaupið hjá sjálfum sér en ekki fólkinu sem þarf þess,

þvílíkar fyrirmyndir sem hugsa fyrst um eigin ras..... en láta svo þá sem þurfa, velja annaðhvort lyf eða mat.